Thieves gone wid Missa Pings money.

Weh dem seh? Jamaica is not a real place.

Fi real man. A nuh lie!

Gleaner report seh tief bruk inna Ping's store (Pings Fabrics) a Savanna-la-mar in Westmoreland an' dem some how manage fi guh inna di safe an' tek out one million dollas!

Mi seh wen mi firs' read di headline poor mi tink seh a one million dollas worth a cloth dem tief. Mi jaw drop. Mi seh to mi self, "A wah really a gwaan?" 

But wen mi click pon di article and start read, mi realise seh a money dem a talk bout.

 Gleana seh di incident 'appen ova las' weekend.

Dem seh now seh bout 5:30 inna di evening di store owna lock up di store fi guh a him yaad.

Howeeverr 'roun 9 oclak di nex' mawnin, him get a phone call from one a di worka dem weh a tell him seh smaddy bruk inna him bizniz place. Dem bruk chru di backdoor. But hear wah! A nuh likkle pyah pyah door, enuh! Is a metal door di man dem bruk chru an' buss off di lock offa di grill suh dem cyan guh inna di peepul dem place.

Di man dem determin' fi tief eeh?

Anyhoo smaddy call di police an' wen dem investigate dem fine seh di metal chiss bruk into, an' one million dollas gaahn.

Dis tiefing ting a get from bad to worse. Seriously now.

Hey! Hey! Yuh memba weh day some tief did tek weh one wholla beach? Yes man, di man dem tief a whol' heap a san', bout 500 truck load according to di The Guardian online news website. Mhmm, Jamaican tief gaahn inta-national! See Guardian article here: https://www.theguardian.com/world/2008/oct/21/jamaica

All mi cyan seh is God 'ave mercy pon wi. Dem bwoy yah look like dem cudda tief out milk outta coffee if yuh leff yuh tee cup cayliss!

Laytah yah. Mi wi talk to yuh soon. Til' next time, walk good.